Das ist die Seite von Gustav Freudmann / Mei Liadabuach

 

A schwera Reng

(A Hard Rain’s A-Gonna Fall/Bob Dylan)

Sog, wo bisdn gwesen, mei scheena Bua?
Und wo bisdn gwesen, mei anzicha nua?
Umadumgschdoibpad bin i, bei zwöf nebliche Beag.
Bin maschiad und bin gräud auf sechs vabogane Schdrossn.
Bin einegschdiegn midtn in siem drauriche Wöda.
Bin gschdaundn vua_r_an dudsnd vo Mea, vo vaseichde.
Bin gwesen külomedtadiaf in Schlund von an Friedhof.
Und a Reng,
a schwera Reng, a schwera Reng, a schwera Reng.
A schwera Reng, dea
wiad boid foin.

Sog, wos hosdn gseng, mei scheena Bua?
Und wos hosdn gseng, mei anzicha nua?
I hob gseng a glans Baby, rundumadum wüde Viecha.
Hob gseng a Schdroß aus Diamandt und kana woa duadtn.
Hob gseng an Osd, an schwoazn, vo dens Bluad owedrobfd is.
Hob gseng an Soi volla Männa mid bluadiche Hämma.
Hob gsenga a Ladta, a weiße, is gschdaundn in Wossa.
Hob gseng zehndausnd dazöhn, mid brochane Zungan.
Hob gseng Schweadta und Gwea, in de Händ vo glane Kinda.
Und a Reng,
a schwera Reng, a schwera Reng, a schwera Reng.
A schwera Reng, dea
wiad boid foin.

Sog, wos hosdn ghead, mei scheena Bua?
Und wos hosdn ghead, mei anzicha nua?
I hob ghead an Dunna, der hod aussebrüd a Woanung.
Hob ghead es Brün von ana Wön, wos kennd schluckn de Wöd.
Hob ghead hundad Drommla, mid Händ volla Blosn.
Hob ghead zehndausnd flisdtan und kana hod zuaghuachd.
Hob ghead an Menschn varreckn und hob ghead vü Leidt lochn.
Hob ghead es Liad von an Dichda, dea is gschduam in da Gossn.
Hob ghead an Glaun, dea wos gwaand hod, drundt auf da Schdroßn.
Und a Reng,
a schwera Reng, a schwera Reng, a schwera Reng.
A schwera Reng, dea
wiad boid foin.

Sog, wem hosdn droffn, mei scheena Bua?
Und wem hosdn droffn, mei anzicha nua?
I hob droffn a glans Kind, nebnan hinichn Boni.
Hob droffn an Weißn, hod an Hund ghobd, an schwoazn.
Hob droffn a Frau, hod brennd wia_r_a Scheidl.
Hob droffn a Madl, hod an Rengbogn ma gebn.
Hob droffn an Mau, woa valedsd duch de Liab.
Hob droffn no an Mau, woa valedsd duachn Hoss.
Und a Reng,
a schwera Reng, a schwera Reng, a schwera Reng.
A schwera Reng, dea
wiad boid foin.

Sog, wos duasdn jeds, mei scheena Bua?
Und wos duasdn jeds, mei anzicha nua?
I geh jeds wieda zruck, weus boid aufaungd ins Regnan.
Wia ins Innasde geh vo de diafschwoazn Wöda.
Wo de Leidt olle vü san und laar eanare Händ san.
Wo de Gifdkeandln iwaschwemman eana es Wossa.
Wo daham is nix aundas wia_r_es dreckichsde Häfn.
Wo in Henka sei Gsichd ollaweu guad vaschdeckd is.
Wo da Hunga is schiach und de Sön san vagessen.
Wo schwoaz is de Foab und de Numma is goa nix.
Und i wias bredichn, dengn, dazön und wias odman.
Und auf de Beagwänd weans olle gaunds deidtlich seng kennan.
Und daunn wia_r_i im Mea schdeh und laungsaum vasinkn.
Oba mei Liad kenn i scho, bevua_r_i aufaung ins Singan.
Und a Reng,
a schwera Reng, a schwera Reng, a schwera Reng.
A schwera Reng, dea
wiad boid foin.


© Gustav Freudmann 2016