De Büdln vakaufns vo de Ghängdn.
De Reisebäss moins braun o.
Da Scheenheidssalon is voi Madrosn.
Da Ziakus is wieda do.
Do kummd da blinde Inschbekda
den haums hybnodisiad.
Aunan Seudendsa haums sei ane Haund ghängd
und de aundre in de Hosn bladsiad.
Und es Iwafoiskommando is voi wualad,
de miassn dringand iagndwohi geh,
waunn mei Hoide und i schaun ausse heidt Nochd
vo da Driabsölichkeidsallee.
Es Oschnbudtl, des is voi guad drauf.
dea wos vo mia redt, maandt si söwa, hods glochd
und hod gschdeckd de Hend hindt in de Doschn,
wias de Bedte Devis mochd.
Jeds kummd da Romeo vuabei und duad seifzn:
Heasd, i glaub du gheasd zu mia, liabs Kind.
Nua daunn sogd ana: Oida, oba du gheasd do ned hea,
bessa seusd di o wia da Wind.
Und waunn de Redtung daunn is ogfoahn,
daunn wiads mid an Moi so schdüh, so schee.
Nua es Oschnbudtl heasd, wos aufwoschn duad
de Driabsölichkeidsallee.
Da Mond, dea hod si fosd vaschdeckd scho
und de Schdean, de san grod dabei.
Bei da Woahsogarin is Schluss heidt.
De ramd scho olle iare Sochn ei.
Ollas außa in Kain und in Abe
und in Bugladn vo Nodredam.
Olle mochn Liab und waunn ned
daunn woadtns auf Regn daham.
Und da guade Samaridta duad si schoin jeds
und richdt si hea fia de Soaree.
Heidt Nochd gehda hi zum Foschingsfesd
in da Driabsölichkeidsallee.
De Ofelia, de schdehd nebnan Fensdta.
I moch ma Suagn, wia de ausschaud.
Aun ian zwarazwanzichsdn Gebuadsdog
is de scho a oide Haud.
Ia Kombinesch is voi aus Eisn
und fian Dod schweamds de gaundse Zeid.
Ia Beruf is ia Röligion und
ia Sind is ia Leblosichkeid.
Ollas außan großn Regnbogn
von Noah is fia sie bassee.
Oba drodsdem duads ollaweu schbechdln
in de Driabsölichkeidsallee.
Da Einschdein in Robin Hudt sein Gwaund,
sei Koffa voi mid wos amoi woa,
is kumman vuabei vua ana Schdund
mid sein Freind, in eifandn Noa.
Ausgschaud hoda voi zum Fiachdn,
wiara hod sein Dschick odedt.
Daunn isa weida gaungan schniffen aund Kaneurealn
und hod vuadrogn es Alfabedt.
Kana kamad drauf, den zum Auschaun,
dabei woa dea amoi berihmd fia de
ölegdrische Geign, wosa gschbüd hod
in da Driabsölichkeidsallee.
Da Dokdta Dreck, dea duad sei gaundse Wöd
in a ledanes Dosal schbean.
Nua seine gschlechdslosn Badsiendn, de
woin eam dauand ois zaschdean.
Sei Assisdendtin, a eadtliche Niadtn,
kennd allaa von Gifdschraunk de Schdöh.
Und sie vawoadt a de Kardtln, wo drauf schdehd,
daboamds eich fia sei Sö.
Olle midanaunda dans Fledtnblosn,
es kenndtsas leichd hean, wisstds eh,
es miassds eich ausselahnan nua weid gnua
aus da Driabsölichkeidsallee.
Iba de Schdrossn haums zuazogn de Vuahäng
und boid is ois fias Fesdtmoi deckdt.
In Fandtom vo da Obpa sei Büdl
vo an Bfoffn is beafekd.
In Casanova dans fiadan min Leffal,
dassa si sicha fühd a so.
Daunn dans eam mid Wuadte vagifdn
und mid Söbsdbewussdsein schdechn o.
Und es Fandtom, des ruafd diarre Madln zua:
Heads, schleichds eich, waunns ned woids vaschdeh.
Da Casanova wiad gschdrofd, weula gaungan is
in de Driabsölichkeidsallee.
Um Midtanochd kumman de Agendtn
und de Iwamenschnbadtie
aussagreud und nahn an jedn ei,
wos mea waaß, eis wia sie.
Daunn zahnsas olle in de Fabrik hi,
wo de Headskaschbalmaschin
wiad eana gschnoid aufn Bugl
und daunn wiad brochd es Kerosin
owe von Schloß do drobn,
vo de Vasicherungsmakla wos schdeh
umadum iwaroi, doss si kana flichdtn kau
in de Driabsölichkeidsallee.
Lob und Daunk in Nero sein Nebdun,
de Didanik daumbfd o in da Frua.
Und a jeda frogd an jedn
auf wöcha Seidtn gheasd dazua?
Und Esra Baund und Di-Es Eljodt,
de fechdn auf da Bruckn obman.
De Kalübsosänga haun si o
und de Fischa hoidn Bluman
fia de Meajungfraun wos vuabeischwebn dan
zwischn de Fensdta vo da See.
Und kana brauchd mea zvü nochdengn
iba de Driabsölichkeidsallee.
Jo, dei Briaf, dea is kumman gesdan,
wia bei da Dia zbrochn is de Schnoin.
Dassd mi gfrogd hosd, wias ma geh duad:
Des woa a Schbaß, dea hod ma gfoin.
De gaundsn Leidt vo desd ma dazöhn duasd,
de kenn i olle, de san voi danebn.
Eanare Gsichda hob i neich miassn zasummbaun,
und eana aundare Nauman gebn.
Sei ma ned bes, i dua ma grod min Lesn schwaa,
schreib ma kane Briaf mea, i bidt di goa schee.
Ned solaungsdas ned schickn duasd
aus da Driabsölichkeidsallee.
