Das ist die Seite von Gustav Freudmann / Mei Liadabuach

 

Ewichkeid

(The Ballad of Frankie Lee and Judas Priest / Bob Dylan)

Eiso, da Huaba Fraunz und da Nowak Joe,
des woan de besdn Freind auf dera Wöd.
Und wia da Huaba Fraunz amoi obrennd woa,
do hod da Joe aussezahd an Haufn Göd.
Ea hods aufbraad, auf a Schamal,
in weidn Laund drausd, vua da Dia.
Hod gsogd "Nimm wosd wüsd, Fraunz, mei Bua,
wos i valian dua, ghead ois dia".

No, da Huaba Fraunz hod si higsedsd glei,
und hod sis Kinn mid de Finga griebn.
Nua undtan koidn Blick von Nowak Joe, do
is eam nix in sein Schädl drin bliebn.
"Dasd du bidtschee ned so schdoan auf mi?", hoda gsogd,
"Weng mein Stoiz, mein bledn, hoid is ned aus.
Weu a Maun muaß a monchmoi allanich sei
und auf des hob i so goa ka Schauss".

Da Joe dea hod zwinkad und hod gsogd:
"Is guad, i schleich mi jeds glei.
Owa bessa du zahsd au und nimmsda gach wosd wüsd,
weu de Marie, de kenndt boid beule sei."
"Jo, sofuad nimm i ma ois wos i brauch,
nua wosd bisd sogsd ma zeaschd und wia weid"
Nau, do hod da Joe owe zua Schdroßn deidt
und hod gsogd "in da Ewichkeid".

"In da Ewichkeid?" hod da Huaba Fraunz gfrogd
und de Schdimm is eam eigfruan dabei.
"Jo, genau" hod gsogd da Joe, "in da Ewichkeid.
A waunns fia di es Baradies dad sei."
"Geh, fia mi dad des sei ois genau goa nix",
hod da Fraunz gsogd und hod glochd.
"Is in Uadnung" hod da Joe zum Obschied gsogd,
"mia seng sie eh boid, häd i ma dochd".

Jeds hod si wieda higsedsd da Huaba Fraunz,
wiara Oaschloch hod a si gfühd.
In den Momendt is kumman a Fremda vuabei,
den hods fosd zrissen bei den Büd.
"Bisd du da Huaba Fraunz, da Dibla,
den wos da Voda is krebiad?
Weu waunnsdas bisd, suachd di drundt aum Eck a Habara,
dea wos Nowak Joe gruafn wiad".

"Na gloa, des is mei Freind",
hod da Fraunz griagd an Meadaschreck.
"I kaunn mi gaunds genau aun eam darinnan,
dea is do grod easchd vo mia weg".
"Nau, des isa daunn scho", sogd da Fremde,
ned lauda wiara Maus.
"Eiso i soi da sogn, er is drundt aum Eck
und bicknbliebn in an Haus."

Nau, da Huaba Fraunz is gaunds wurlad wuan,
ea hod higschmissn ois und is grennd,
bis a endlich zu den Bladsl kumma is,
wora in Nowak Joe glei hod kennd.
"Wos fiara Haus isn des?" hoda gfrogd,
"Hods mi gwahd in foischn Dram?"
"Des", hod da Joe drauf gsogd, "des is ka Haus,
des is ka Haus - des is daham".

Jeds hod da Fraunz augfaungd ins Zidan,
woa nimma bled, woa nimma gscheid,
hod goa nimma gwussd, wos a dau hod ois
und de Kiachnglockn haum daweu gleidt.
Drausd is a gschdaundn und hod gschdoad auf des Haus,
wos wia de hölle Sunn hod gschdroid
und wos hod ghobd viarazwanzich Fensdta
und in an jedn a Kods, wia gmoid.

Auffe is da Fraunz de Schdiagn grennd,
mid riesngroße Schriadt.
Da Schaum is eam aus da Pappn gfoin,
und vo Middanochd au hod a gwiadt.
Sechzehn Nächd und sechzehn Dog
hods dauad, sei Raserei,
und aum siebzehndn Dog is a vaduaschdt in de Oam
von Joe und es woa vuabei-

Kana hod prowiad wos zum Sogn,
es woara Heds, wias eam hom aussedrong.
Kana außa in klanan Nochboasbuam,
wos eam hod eigschoad bis iwan Grong.
Umadum is a gaunga daunn gaunds allaa,
mid seina Schuid so guad vaschdeckd.
Und leise hod a in si eine gmuamed
"Des wiad nie wean aufdeckd."

Und de Moral vo dera Gschichd, von den Liad is,
in gaunds weniche, afoche Wuadt,
doss niemois ana duadt sei soidt,
wo ana ned hi ghean duadt.
Waunnsd dein Nochban wos Schwares zahn siechsd,
nau, daunn hüf eam mid seina Losd,
und ned büdt da ei, du findsdt es Baradies
in an Haus wos di dei Lebn kosdt.


© Gustav Freudmann 2016