Das ist die Seite von Gustav Freudmann / Mei Liadabuach


Wos? Und fia wos?

Draussd dan sa si gegnseitich umniadtn, aufschlidzn, weggabombn, de Kebf ohoggn und I sids daham, in mein glan Kammal, vuan Kombjudta, und beschäfdig mi mid sinnlosn Zeigs. Luxus hoid. Gehd oba eh ned länga eis bis mi a_r_ana umniadt, aufschlidzd, weggabombdt, ma in Schedl ohoggdt oda sunsd wos gschiechd...

Jeds vielleichd kuaz zua Frog "Fia wos?". De is afoch zum Beauntwuadtn: Hob i was Bessas zduan? Eisdann...

Augfaungd hod de Gschichd wia_r_i amoi in da Fruah, sicha scho zum dausndsdn Moi, in Radio in Wondara ghead hob. A Liad von Dion, dea wos eigendtli Dion Di Mucci haaßt. Aungeblich. I kenn eam jo ned. I sogs glei vuaweg, des Liad hea_r_i ma gean no a boa dausnd Moi au, ohne doss ma fad is. Nua doss do kane Missvaschdändnis ned aufdauchn. Jedenfois, i hea des Liad und mid an Moi, i woa no a bissl draamhabpadt, sunsd warad ma eh nix eigfoin, foid ma dazua es Wuad "Waundarods" ei. Da Dion wiads woascheinlich ned kennan, maunche do bei uns dafia gaunz sicha und de, des ned kenna, de kennan si sicha wos vuaschdön drundta. Eiso, wia ma des Wuad eifoid, denk i ma scho, des Liad kenndtasd jo genauso in unsara eiganan Schbroch a singan...

Und so kumm i nadialich, a boa wean mi eh beim ledzdn Sods scho duachschaud hom, zum Dema "unsa eigane Schbroch". Mia san jo do a bissl bled drau, weu de Schbroch, wos ma redn soin, de kemma ned und de wos ma kenna dadn, de soidtad ma ned. Oba vülleichd is des eh auf da gaundsn Wöd a so. Drum wieda zruck zum Waundarodsn.

Den Degsd kenndasd a ins Hochdeidtsche ibasedzn. Wenigsdns es Wuad Wondara. "Ich bin der Wanderer, man nennt mich den Wanderer..." und so weida. Oba dadt sie des ned unhamlich gschraufd auhean? Und so hob i ma augfaungd ins Eibüdn, doss si englische Degsd eigendli vü leiwaunda in unsa Schbroch ibasedsn lossen, eis ins Hochdeidtsche, scho allanich wengan Sodsaufbau, fois ma des aso nend. I sog jeds bewussd, doss i ma des eibüd hob, weu waunn i sogad, i warad draufkumma, kamad sofuad ana, dea mid Rechd sogad, dossas bessa waaß, und beweisad ma es Gegndeu. Auf des loss i mi glei goa ned ei und drum bleib i bein Eibüdt haum.

Eiso, i hob ma des eibüdt und bein Waundarodsn is des glei supaleiwaund gaungan. I glaub a es is gaunz guad wuadn, weu olle denan i des zagd hob, hods gfoin. Do bin i glei a bissl fuascha wuan und hob ma eis nächsdas a Liad von oidn Feds Domino vuagnumman. Des hob i auf ana Foad vo Kaumberg noch Wean ibasedsd. Am Beifohrasids, eh gloa. Aus Nu Oaliens is Favoridtn wuan und des is gaunga wia nix. Bein Zruckfoan woas scho längsd feadtich. So hob i ma daunn denkd, jeds nimmsda amoi a boa vo de oidn Hodan her, de da eh imma scho gfoin hom, die meisdn scho seid vierzg Joa, waunn ned länga. Maunchmoi woa_r_i rechd fleissich, amoi hob i leida a längare Bausn mochn miassn, de mi kennan, wissn warum, oba iagndwaunn is wieda weida gaungan und i glaub, es wiad a no a Weu weidageh.

So is jednfois ans zum aundan kumman und amoi hob i ma dengd, de Saummlung wos do endtstehd sogd auf a Oadt vülleichd mea iwa di aus, eis waunnsd wem zwa Schdund laung dei Lebn dazöhsd. Drum hob i ma daunn dengd, i nenn es Gaundse "Mei Liadabuach", gib bei an jedn Degsd an Link vo Ju-Dub dazua, doss sis a jeda auhuachn kau a, und schdös ins Indtanedt.

Weu easchdns is grod de Oadt vo Musik, wos do vuakummd, a gaunds a wichdiga Deu von mein Lebn, imma scho gwesn, und zweidtns kaunn si jeda, wos si de Musik auhuachd, a gaunds a guades Büd vo den mochn, wos mia wos bedeidtn duadt. Undta aundan hoid. Und waunn ned, daunn hoda wenigsdns a Schdund laung leiwaunde Musik ghead. Hoff i wenigsdns. Des soidn de Leid, wos min Umniadtn, Weggabombn, Aufschlidsn und Kepfohoggn beschäfdigd san, vülleichd a duan. Wenigsdns daunn und waunn und am besdtn glei.

A Gsadsl no zua Oadt wia_r_i meine Degsd aufgschriebn hob. In Wesendlichn so, wias ma grod eigfoin is. Regen gibds fia unsa Schbroch jo eh kane und solaungs kane Regen gibd, kaunnsdas eh nur_a_so mochn. Des homs vua_r_a boa hundad Joa a ned aundaschd gmochd, domois wias no ka gscheids Schrifddeidtsch gebn hod. In de oidn Haundschrifdn findsdt jo a gnua Seidtn wosas gschoffd hom, a und es söbe Wuadt zwamoi hindtaranaunda aundaschd zum Schreibn. Deswegn san meine Degsd nadialich a kombledt uneinheidlich. Ned amoi waunn i woidt kenndtat is, weu da miassad i jo vuaher easchd amoi olle Regln söba ausoabeidtn, aufschreim, vaschdeh und daunn a no auswendich lernan. A bissl vü auf amoi, fia an dea scho oid is und eigendli nur de Zeid vageh lossn wü.

Außadem, des wiad eh a jeda Lesa meakn, i bin scho so long weg aus Wean, doss i ofd scho goa nimma waaß, wia ma wos sogad, geschweige denn wia mas schreibad. Eiso a bissl Gscheadisch wiad daunn und waunn sicha durchschlogn. Oba des soidtad ma eigendlich eis a Bereicharung seng. Oda?

Unsa Schbroch is sowieso ned afoch zum Schreibn, weu mid de boa Buchschdobn wos ma haum, kummsd ja eh bei Weidn ned aus. Allaa des mid de hoadtn und de waachn Konsonandn. Do brauchasd scho no a poa Schdufaln mea. A Zeichna kummd jo a ned weid, mid an Ansablei und an HB. Vo de Wokale, vo denan woi ma goa ned easchd ins Redn aufaungan... Wuaschd! I deng ma, soidtads iagendwaunn amoi Regen fia unsa Schbroch gebn, daunn dadts eh nimma es söbe sei. Und dalebn wia_r_i des sowieso ned. Eiso schreib i weida wias ma eifoid. Fia guade Dibs bin i nadialich jedazeid daunkboa. Fia Guade...

Es gleiche güd nadialich a fia meine Degsd. Es is jo a ned aundaschd wie bein Billa, waunnsd da_r_a Schoin mid ochd Äbfe kaufsdt. Ana is vaschimbped, ana is vafäud, Audidschde san a ofd dabei, oba da ane oda aundare is jo daunn drodsdem genießboa und ned aundaschd wiads mid mein Liadabuach sei. Eiso waunn wea Idähn hod dazua, wias bessa gehd, imma nua hea damid. Es is jo bei dera Suadtn vo Degsd scho im Originäu ofd so, doss da Sinn endweda sea vabuagn is - oda sie sea in Grenzn hoid. Und des ane oda aundare vaschdehsd scho allaa deswegn ned, weus hoid a fremde Schbroch is und ned so vadtraud wia de eigane. Oba weu_r_i eh nie zfriedn bin mid meina Oabeid, wia_r_i sicha eh no vü drau umadumdokdan. Es brauchd si eiso kana wundan, waunn da ane oder aundare Degsd heid a so is und muang wieda aundaschd.

A Weadtal no zum Kopbireidt. De Degsd, wos do zum Findn san, deaf a jeda singan, egal ob as kau oda ned. Fia des san Liadln jo do. I singads am Liabsdn söwa. Vülleichd findn si a boa Musika, wos dabei midmochn und si bei mia mödn woin. Und waunn si a findn soidtn, wos de Degsd söwa vawendn woin, womeglich goa bei an Kondsead, is fia mi vua oim a große Ea und i dad mi ur gfrein. Wissn dad is oba in jedn Foi gean. Waunns gehd vuahea. Weu easchdens nudsd da die Ea nix, waunnsd nix davo waaßd und zweidns dad i ma sowos vielleichd söwa gean amoi auhuachn. Logisch. Waunn ana nadialich damid a Blodtn mochd, fois sowas no gibd, und davo daunn a no muadsreich wiad, fois sowas ibahaupdt no gehd, ibahaubdt heidzudog, daunn wiada si hoid vuahea mid mia ins Eivanehman sedsn, weu ma sunsdt a Broblem griagn.

Vo de zu dawoadtendn Eikinfd lod i jo daunn eh olle Lesa von dera Seidtn auf a Krachal ei. Oda_r_auf a Bia.

Ah jo, und eis Ollaledsdas no a Messidsch aun meine Habara bei Gugl und Ko: Es duad ma lad, waunns min Indizian von dera Seitn a Broblem hobds. Browian weadsas zwoa eh, gehd jo goa ned aundaschd, oba i fiachd, es wiad ned gaunds hihaun. Mochds eich nix draus, gibd ja a gnua aundare Degsd im Web, de kana brauchd und dena Jabana oda Chinesa wiad sicha nix ogeh...

Kaumberg, März 2016


© Gustav Freudmann 2016, 2017, 2018, 2019